தேங்காய் திரட்டிப் பால்

தேவையான பொருட்கள்:
தேங்காய் : 2
வெல்லம் : 750 கிராம்
ஏலக்காய் : 5
நெய் : 50 கிராம்

செய்முறை:

முதலில் தேங்காயை அடிவரை துருவாமல் வெள்ளையாகத் துருவி எடுத்துக் கொள்ள வேண்டும். துருவிய தேங்காயை மிக்ஸியில் நன்றாக பட்டுபோல அரைத்து அந்த விழுதினை தனியே வைத்துக்கொள்ளவும். வெல்லத்தை பாகு காய்ச்சி வடிகட்டி வைத்துக் கொள்ளவும்.

ஒரு அடி கனமான பாத்திரத்தை அடுப்பில் வைத்து வெல்லப் பாகை ஊற்றி நன்கு கொதி வந்ததும், அரைத்து வைத்துள்ள தேங்காய் விழுதினைக் கலந்து, அடிபிடிக்காத வண்ணம் கிளறிக் கொண்டே இருக்க வேண்டும். முக்கால் பாகம் வெந்ததும், நெய்யினை ஊற்றி கிளறவும். ஊற்றிய நெய் பிரிந்து வரும்போது ஏலக்காய் பொடி தூவி கலந்து வேறு பாத்திரத்தில் மாற்றி விடவும். தேங்காய் திரட்டிப் பால் தயார்.

எங்கள் ஊர் திருமணங்களில் தேங்காய் திரட்டிப் பால் மிகவும் பிரசித்தம். தேங்காய்க்கு வயிற்றுப் புண், வாய்ப் புண் இவற்றை ஆற்றும் சக்தி உள்ளது.